कुडाळ : आठशे रु. मागितल्यानंतर ते न दिल्याच्या रागाने लोखंडी रॉ डने मारहाण करून शिवीगाळ केली व ठार मारण्याची धमकी दिल्याची घटना पावशी-मिटक्याचीवाडी नाका येथे बुधवारी दुपारी साडेबारा वाजण्याच्या सुमारास घडली.
याप्रकरणी संशयित प्रसाद गोविंद तवटे (रा. पावशी-धरणवाडी) याच्यावर कुडाळ पोलीस ठाण्यात गुन्हा दाखल करण्यात आला आहे. या घटनेतील जखमी गोविंद जयराम वराडकर (३४, रा. पावशी तवटे-महाडेश्वरवाडी) यांच्यावर कुडाळ ग्रामीण रुग्णालयात उपचार करण्यात आले. याबाबत कुडाळ पोलीस ठाण्यात गोविंद वराडकर यांनी दिलेल्या फिर्यादीनुसार, बुधवारी कुडाळचा आठवडा बाजार असल्याने ते सकाळी साडेअकरा वाजण्याच्या सुमारास पावशी येथून त्यांचा मित्र महेंद्र नारायण तवटे यांच्यासोबत त्यांच्या मोटारसायकलने बाजाराला आले. बाजारात खरेदी करून ते दुपारी साडेबारा वाजण्याच्या सुमारास पुन्हा त्याच मोटारसायकलने महेंद्र यांच्यासोबतच पावशी येथे जात होते. वाटेत पावशी- मिटक्याचीवाडी नाका येथे वराडकर यांच्या ओळखीचा प्रसाद तवटे याने हात दाखवून त्यांची मोटारसायकल थांबविली. तो वराडकर यांच्याकडे आला आणि त्यांच्याकडे आठशे रु. मागितले.
त्यावेळी त्यांनी आता माझ्याकडे पैसे नाहीत, असे त्याला सांगताच तो त्यांना शिवीगाळ करू लागला. ते व त्यांचा मित्र मोटारसायकलने जायला निघताच पाठीमागून तो मोटारसायकलच्या डाव्या बाजूला आला आणि त्याने वराडकर यांच्या डोक्यावर लोखंडी रॉड मारून दुखापत केली. तसेच शिवीगाळ करून ठार मारण्याची धमकी दिली. त्यानंतर तो तेथून पळून गेला. वराडकर यांच्या डोक्याला जखम झाली. त्यांचा मित्र महेंद्र तवटे यांनी त्यांना येथील ग्रामीण रुग्णालयात दाखल केले.
