अलीगड: एका मुलाने आपल्या आईला जिवंत जाळल्याची भयंकर घटना समोर आली आहे. या मुलाने पोलीस ठाण्यातच आपल्या आईला जिवंत पेटवलं. उत्तर प्रदेशातील अलीगढमध्ये ही धक्कादायक घटना घडली आहे. या मुलाने पेट्रोल टाकून आपल्या आईला जिवंत जाळले. या घटनेत ही महिला ४० टक्के भाजली असल्याची माहिती आहे. सुमारे पाच मिनिटं पेट घेतल्यानंतर घटनास्थळी उपस्थित असलेल्या पोलिसांनी माती आणि पाणी टाकून कशीबशी ही आग विझवली आणि महिलेला वाचवलं. त्यानंतर महिलेला तातडीने सीएचसी रुग्णालयात पाठवण्यात आलं. तिची प्रकृती गंभीर असल्याने तिला जेएन मेडिकल कॉलेज सेंटरमध्ये पाठवण्यात आले. महिलेचं नाव हेमलता असल्याची माहिती आहे. या घटनेचा व्हिडिओ व्हायरल झाला आहे.
नेमकं काय घडल?
ही महिला पोलिस स्टेशनमधून बाहेर पडते, तसा तिचा मुलगाही तिच्या मागे मागे येतो. मग मुलगा पेट्रोलची बाटली बाहेर काढतो, आईवर ओततो आणि तिला पेटवतो. त्यानंतर तो स्वत: त्या घटनेचा व्हिडिओ बनवतो. यावेळी घटनास्थळी एकच खळबळ माजते. लोक इकडे-तिकडे धावू लागतात. त्यानंतर घटनास्थळी उपस्थित पोलीस आग विझवण्याचा प्रयत्न करतात.
या महिलेने आपल्या कुटुंबीयांविरोधात विनयभंग आणि घराशी संबंधित प्रकरणात एफआयआर दाखल केला आहे. त्याच्या चौकशीसाठी त्यांना पोलीस ठाण्यात बोलावण्यात आले होते. यादरम्यान, महिलेच्या मुलाने तिला पेटवून दिले. जखमी महिलेला उपचारासाठी रुग्णालयात पाठवण्यात आले आहे. तर, तरुणाला ताब्यात घेऊन त्याची चौकशी करण्यात येत आहे, अशी माहिती डीसीपी राजीव द्विवेदी यांनी दिली.
पीडित हेमलताचा तिच्या कुटुंबीयांशी मालमत्ता आणि जमिनीवरून वाद सुरू होता. याप्रकरणी तिने एफआयआरही दाखल केला होता, ज्यामध्ये आरोपपत्र दाखल करण्यात आले आहे. घरच्यांनी तिला मारहाण केल्याची तक्रार होती, त्यामुळे दोन्ही पक्षांना पोलीस ठाण्यात बोलावण्यात आले होते. त्यांच्यात घर आणि पैशांबाबत चर्चा सुरू असताना महिला पोलीस ठाण्यातून बाहेर गेली आणि तिच्या मुलाने तिच्या अंगावर पेट्रोल टाकून तिला जिवंत पेटवलं. यानंतर पोलिसांनी तात्काळ मुलाला अटक केली.
ही संपूर्ण घटना पोलीस ठाण्यात लावण्यात आलेल्या सीसीटीव्हीमध्ये कैद झाली. घटनास्थळी उपस्थित पोलिसांनी आग विझवली त्यात काही पोलिसांचेही हात भाजले. त्यानंतर महिलेला तातडीने रुग्णालयात नेण्यात आले. महिला ४० टक्के भाजली असून, तिच्यावर उपचार सुरू असल्याची माहिती आहे
घर आणि संपत्तीवरून वाद
मिळालेल्या माहितीनुसार, ही महिला तिच्या मुलासोबत सासरच्या घरात तिला देण्यात आलेल्या भागात राहत होती. महिलेने सासरच्या लोकांना तिला तिची जमीन विकायची असल्याचं सांगितलं. त्यावर दोन्ही पक्षामध्ये चर्चा सुरू होती. मात्र, पैशांवर त्यांचं एकमत होत नव्हतं. त्यावरुन हे प्रकरण पोलिसात गेलं आणि मग पोलीस ठाण्यात ही भयंकर घटना घडली.
