गणपतीबाप्पाचे मनोभावे घेतले दर्शन
कणकवली : माघी गणेशोत्सवाच्या निमित्ताने राष्ट्रवादी काँग्रेस तालुकाध्यक्ष तथा फोंडाघाट जि. प. मतदारसंघाचे इंडी आघाडीचे उमेदवार अनंत पिळणकर यांनी फोंडाघाट जिल्हा परिषद मतदारसंघातील गणेश मंदिर घोणसरी, गणेश मंडळ वाघेरी, गणपती मंदिर गडगेसखल, फोंडाघाट गांगोवाडी मंगलमूर्ती सांस्कृतिक कला मंच, फोंडाघाट कोरगावकरवाडी गणेश मंदिर येथील सार्वजनिक गणेशोत्सव मंडळांना भेटी दिल्या. यावेळी त्यांनी श्री गणरायाचे मनोभावे दर्शन घेत गणरायाच्या चरणी नतमस्तक होत सर्व नागरिकांना सुख, समाधान, समृद्धी आणि उत्तम आरोग्य लाभो, अशी प्रार्थना केली.
यावेळी पिळणकर यांच्यासोबत फोंडाघाट पंचायत समितीचे उमेदवार चैतन्य सावंत, सौ. अवसरे, सुरेश टक्के, रमेश राणे, सिद्धेश राणे, मिनल पिळणकर, अनिता पिळणकर, संजना कोलते, बाळकृष्ण मसुरकर, देवेंद्र पिळणकर, पार्थ पिळणकर आदी उपस्थित होते. गणेशोत्सव मंडळांच्या वतीने पुष्पगुच्छ देऊन पिळणकर यांचे स्वागत करण्यात आले. गणेशोत्सव मंडळांनी उत्साहात विविध धार्मिक कार्यक्रमांचे आयोजन केले होते.
भाविकांनी विधिवत पूजा-अर्चा, आरती, भजन-कीर्तन आणि तीर्थप्रसाद तसेच महाप्रसादचा श्रद्धेने लाभ घेतला. या निमित्ताने फोंडाघाट विभागात भक्तिमय वातावरण निर्माण झाले होते. सार्वजनिक गणेशोत्सव मंडळांनी स्वच्छता, शिस्त आणि सामाजिक जबाबदारी जपत उत्सव साजरा केला.
