बिडवाडी पंचायत समिती भाजपसाठी बिनविरोध
कणकवली : तालुक्यात जिल्हा परिषद व पंचायत समिती निवडणुकीच्या अनुषंगाने गुरुवारी तहसील कार्यालयात उमेदवारी अर्जांची छाननी प्रक्रिया पार पडली. या छाननीत तीन उमेदवारांचे अर्ज अवैध ठरवण्यात आले. त्याचा थेट परिणाम बिडवाडी पंचायत समिती मतदारसंघावर झाला असून हा मतदारसंघ भाजपसाठी बिनविरोध झाला आहे. छाननीनंतर आता तालुक्यात एकूण ९१ उमेदवार निवडणूक रिंगणात राहिले आहेत. यामध्ये जिल्हा परिषदसाठी ३५ तर पंचायत समितीसाठी ५६ अर्ज वैध झाले आहेत.
जानवली पंचायत समिती मतदारसंघातील अपक्ष उमेदवार अनिता गजानन चव्हाण यांनी अर्जासोबत आवश्यक शपथपत्र सादर न केल्यामुळे त्यांचा अर्ज अवैध ठरवण्यात आला. बिडवाडी पंचायत समिती मतदारसंघातील उबाठा शिवसेनेच्या उमेदवार विद्या विजय शिंदे यांना २००१ नंतर तीन अपत्ये झाल्याची बाब भाजपच्या उमेदवाराने छाननीदरम्यान निदर्शनास आणली. त्यानुसार विद्या शिंदे यांचा अर्ज अवैध ठरवण्यात आला. तसेच लोरे नंबर १ पंचायत समिती मतदारसंघातील उबाठा शिवसेनेच्या उमेदवार सिद्धीशा सिद्धेश राणे या कुडाळ पंचायत समितीच्या मतदार असल्याने त्यांचाही अर्ज अवैध घोषित करण्यात आला.
दरम्यान, तालुक्यातील कलमठ जिल्हा परिषद मतदारसंघातून वैदही गुडेकर, कासार्डे जिल्हा परिषद मतदारसंघातून नीरज मोरये तसेच नांदगाव पंचायत समिती मतदारसंघातून प्राची मोरये यांनी प्रत्येकी दोन उमेदवारी अर्ज दाखल केले होते. दोन्ही अर्ज वैध ठरल्याने नियमांनुसार प्रत्येकी एक अर्ज आपोआप रद्द करण्यात आला.
अर्ज छाननी प्रक्रिया पूर्ण झाल्यानंतर तालुक्यातील ९१ उमेदवारांचे ९१ अर्ज वैध ठरले असून आता निवडणुकीच्या पुढील टप्प्यांकडे सर्वांचे लक्ष लागले आहे.
