ओरोस येथे जिल्हाधिकारी कार्यालयाबाहेर शुभेच्छा भेट
कणकवली : कणकवली नगरपंचायत निवडणुकीत कणकवली शहर विकास आघाडीच्या विजयात किंगमेकर ठरलेले कुडाळ – मालवणचे आमदार निलेश राणे आणि शहर विकास आघाडीचे नगराध्यक्ष पदाचे विजयी उमेदवार संदेश पारकर यांची आज ओरोस येथील जिल्हाधिकारी कार्यालयात भेट झाली. या भेटीदरम्यान आमदार निलेश राणे यांनी संदेश पारकर यांचे अभिनंदन करत त्यांना पुढील कार्यकाळासाठी शुभेच्छा दिल्या.
कणकवली नगरपंचायत निवडणुकीत शहर विकास आघाडीने सत्ता मिळविल्यानंतर संदेश पारकर आणि आमदार निलेश राणे यांची जाहीरपणे झालेली ही पहिलीच भेट असल्याने या भेटीकडे राजकीय वर्तुळाचे विशेष लक्ष लागले होते. निवडणुकीदरम्यान आमदार निलेश राणे यांची भूमिका निर्णायक ठरल्याचे बोलले जात होते. त्यामुळे विजयानंतरची ही भेट आगामी काळातील कणकवली शहर विकासाच्या दृष्टीने महत्त्वाची मानली जात आहे.
या भेटीत कणकवली शहराच्या विकासकामांबाबत सकारात्मक चर्चा झाल्याची माहिती सूत्रांकडून मिळत असून, भविष्यात शहराच्या सर्वांगीण विकासासाठी समन्वयाने काम करण्याचा संदेश या भेटीतून गेला आहे.
