कन्हैया पारकर कणकवली शहरात शकुनीमामा म्हणून ओळखले जातात
कणकवली : पालकमंत्री नामदार नितेश राणे यांना धृतराष्ट्राची उपमा देणारे ठाकरे गटाचे कणकवलीतील पदाधिकारी कन्हैया पारकर हे कणकवलीतील शकुनीमामा म्हणून ओळखले जात असल्याचा घणाघाती आरोप भाजपा शहराध्यक्ष अण्णा कोदे यांनी केला आहे. याच भूमिकेमुळे कन्हैया पारकर यांना नगरपंचायत निवडणुकीत साधी उमेदवारीही देण्यात आली नाही, असा दावाही त्यांनी केला.
अण्णा कोदे यांनी प्रसिद्धीस दिलेल्या निवेदनात म्हटले आहे की, कन्हैया पारकर यांनी यापूर्वीही नगरपंचायत कार्यालयातून माजी केंद्रीय मंत्री तथा राज्याचे माजी मुख्यमंत्री आणि सिंधुदुर्ग जिल्ह्याचे सुपुत्र नारायण राणे यांचे फोटो काढले होते. आता राणेंची हरकत नसेल तर फोटो लावू, असे सांगणे म्हणजे जनतेची दिशाभूल करण्याचा प्रयत्न आहे. राणेंची हरकत आहे की नाही, हे सांगण्यासाठी नारायण राणे साहेब कन्हैया पारकर यांच्याकडे येणार नाहीत. कन्हैया पारकर इतके मोठे नेते नाहीत की त्यांनी राणेसाहेबांवर बोलावे, असा टोकाचा हल्ला त्यांनी केला.
भाजपा शहराध्यक्ष म्हणून आपण ठामपणे सांगत आहोत की, नारायण राणे साहेबांना नगरपंचायत कार्यालयात फोटो लावण्यास कोणतीही हरकत नाही. देशाचे माजी केंद्रीय मंत्री, राज्याचे माजी मुख्यमंत्री आणि सिंधुदुर्ग जिल्ह्याच्या विकासात मोठे योगदान असलेले नेतृत्व म्हणून त्यांचे फोटो नगरपंचायतमध्ये लावण्यात आले होते, असे कोदे यांनी स्पष्ट केले. असे फोटो काढून त्यांचा अपमान करणे हे आमदार निलेश राणे यांनाही कधीच मान्य होणार नाही, असेही त्यांनी नमूद केले.
नगराध्यक्ष दालनात नारायण राणे यांचे फोटो लावायलाच हवेत. यासाठी आता नगराध्यक्षांची परवानगी घ्यावी लागेल, सीओंना विचारावे लागेल, अशा भंपक आणि खोट्या गोष्टी लोकांपर्यंत पोहोचवू नयेत, असा इशाराही कोदे यांनी दिला. फोटो आधी काढायचे आणि नंतर लावायला हरकत आहे का, अशी विचारणा करणे म्हणजे सरळसरळ डबल ढोलकीगिरी असल्याची टीकाही त्यांनी केली.
ज्या नारायण राणेंमुळे कन्हैया पारकर यांच्या भावाला राजकारणात संधी मिळाली, ज्यांनी त्यांना लाल दिवा दिला, त्या राणेसाहेबांचा फोटो बॅनरवरही लावायला हे पारकर कुटुंब तयार नाही, हा कृतघ्नतेचा कळस असल्याचे कोदे म्हणाले. निलेश राणे यांच्या पाठिंब्यामुळे नगराध्यक्षपद मिळाले आणि काही तासांतच त्यांना विसरणे, ठाकरेंच्या व्यासपीठावर जाणे, एकनाथ शिंदे यांची भेट घेणे आणि पुन्हा तिसऱ्याच दिशेने वाटचाल करणे, हा कन्हैया पारकर यांचा जुना इतिहास असल्याचा आरोप त्यांनी केला.
कणकवलीकरांना ही सवय चांगलीच माहिती आहे. मालवणी भाषेत अशा प्रवृत्तीला ‘उंडग्या ढोर’ असे म्हणतात, असा शब्दप्रयोग करत कोदे यांनी संताप व्यक्त केला. नारायण राणे यांचा फोटो लावून उपकारांची परतफेड होणार नसली, तरी किमान कृतघ्न न होता कृतज्ञता तरी दाखवा, असे आवाहन करत त्यांनी आपली भूमिका स्पष्ट केली.
