कणकवलीकरांनी विकास करण्यासाठी मला एक संधी द्यावी
९०० कोटींच्या घनकचरा प्रक्रिया प्रकल्पाचे काय झाले?
भयमुक्त आणि भ्रष्टाचार मुक्त कणकवली साठी माझी लढाई
संदेश पारकर यांनी घातली भावनिक साद
कणकवली : कणकवली शहरातील कचऱ्यावर प्रक्रिया करण्यासाठी ९०० कोटींचा घनकचरा प्रक्रिया प्रकल्प सत्ताधारी आणणार होते. या प्रकल्पासाठी ३ एकर जमिनी कराराने एजी डॉटर्स या कंपनीला दिली होती. या प्रकल्पाचे काय झाले? भयमुक्त आणि भ्रष्टाचार मुक्त कणकवली साठी माझा लढाई आहे. माझी शेवटची निवडणूक, कणकवलीकरांनी मला साथ द्यावी, असे भावनिक आवाहन कणकवली नगरपंचायत नगराध्यक्ष पदाचे उमेदवार संदेश पारकर यांनी केले.
आपल्या निवासस्थानी आयोजित केलेल्या पत्रकार परिषदेत श्री. पारकर बोलत होते.
कणकवली शहराच्या विकासासाठी ४०० कोटींचा निधी आला, हा निधी गेला कुठे?
मागील ८ वर्षांत सत्ताधारी केलेल्या भ्रष्टाचारी कारभारामूळे न. पं. च्या निवडणुकीत शहरवासीय राजकीय परिवर्तन घडवतील, असा विश्वासही संदेश पारकर यांनी व्यक्त केला. कणकवली न. पं. निवडणुकीसाठी मतदानाला शेवटचे काही दिवस राहिले आहेत. मी शहरात प्रत्येक लोकांपर्यंत पोहोचण्याचा प्रयत्न केला आहे. त्यांच्या गाठीभेटी घेत असताना परिवर्तनाचा आवाज दिसला आहे. शहर विकास आघाडीची सत्ता आल्यानंतर मी सुडाचे राजकारण करणार नाही. गेल्या आठ वर्षांमध्ये जो कारभार झाला, त्याची आम्ही चौकशी करणार आहोत. ९०० कोटींचा घन कचरा प्रक्रिया प्रकल्पासाठी एजी डॉटर्स या कंपनीला तीन एकर जमिन कराराने दिली होती. सत्ता आल्यानंतर ती गहान ठेवलेली जमीन सोडवणार आहोत. सत्ताधाऱ्यांचा एकच ठेकेदार आहे, हा ठेकेदार सत्ताधाऱ्यांचा पार्टनर आहे. ठेकेदाराच्या पैशांतून सत्ताधाऱ्यांनी परदेशी वाऱ्या केल्या आहेत. त्याची चौकशी केली जाईल, असा इशारा श्री. पारकर यांनी दिला. कणकवली शहरात जुने भाजी मार्केट येथे ८५ लाखांचे सुलभ शौचालय बांधण्यात आले. पर स्वेअर फूट १८ हजार रुपये खर्च बांधकामावर झाला, असा दर कुठेही जगात मिळणार नाही. सत्ताधाºयांची ८ वर्षांपूर्वी असलेली संपत्ती आणि आजची संपत्ती किती आहे? हे जनतेला लक्षात आले आहे. माझी ही शेवटची निवडणूक आहे. जनतेच्या विश्वासावर मी निवडणूक जिंकणार आहे. कणकवलीचे १० वर्षे सरपंचपद आणि नगराध्यक्षपद मी सांभाळले आहे. या कालावधीत मी केलेला विकास जनतेला दिसत आहे.
सत्ताधाऱ्यांनी व्यापार हिरावून घेतला. त्यामुळे व्यापाऱ्यांवर उपासमारीची वेळ आली आहे. सिद्धार्थनगर परिसरात गरीब माणसे झोपडपट्यांमध्ये राहत आहेत. त्यांना सत्ताधाऱ्यांना शासकीय योजनांतून घर बांधून देण्याचे आश्वासन दिले होते, हे आश्वासन हवेत विरले आहे. कणकवली शहरातील सध्या हिंदू, मुस्लिम, दलित, ख्रिश्चन असे आम्ही सर्व एकत्र नांदणारे आहोत. शहर विकास आघाडीचे सत्ताआल्यानंतर आपुलकीचे वातावरण कारण्यासाठी आम्ही प्रयत्न करणार आहोत. लोकशाहीत हा मतदार हा राजा
आहे. न. पं. निवडणुकीत मतदारांनी शहर विकास आघाडीच्या उमेदवारांच्या नारळ निशाणीवर बटन दाबून विजयी करावे. सत्ताधाऱ्यांनी विकासाच्या मुद्द्यावर निवडणूक लढवणार सांगितले होते. मात्र, आता ही निवडणूक धनशक्ती विरुद्ध जनशक्ती अशी झाली आहे. आम्ही भ्रष्टाचारी लोकांच्या विरोधात एकत्र आलो असून त्यांच्याविरुद्ध आम्ही लढत देत आहोत, असे संदेश पारकर म्हणाले.
