आरोपी तर्फे अॅड. अक्षय चिंदरकर यांचा युक्तिवाद
कणकवली : फोंडाघाट येथे एका विवाहित महिलेस विनयभंगाचा त्रास दिल्याच्या प्रकरणी अटक करण्यात आलेल्या आरोपी संकेत चौगुले (रा. फोंडाघाट, बावीचे भाटले) याला न्यायालयाने १५ हजार रुपयांच्या सशर्त जामिनावर मुक्त केले आहे.
९ ऑक्टोबर २०२५ रोजी पीडित विवाहित महिला आपल्या मुलांना शाळेत सोडून एकटीच घरी जात असताना आरोपीने तिचा मार्ग अडवून, तिच्या मनाला लज्जा निर्माण होईल असे कृत्य केल्याचा प्रकार घडला होता. या घटनेवरून कणकवली पोलिसांनी भारतीय न्याय संहिता २०२३ चे कलम ७४, ७५, ७९, १२६, ११५(२), ३५१(२) नुसार गुन्हा दाखल करून आरोपीस अटक केली होती.
यानंतर आरोपी न्यायालयीन कोठडीत असताना जामिनासाठी अर्ज दाखल करण्यात आला होता. या अर्जावर झालेल्या सुनावणीत जिल्हा व सत्र न्यायाधीश एस. एम. देशपांडे यांनी संशयित आरोपीस १५ हजार रुपयांचा सशर्त जामिन मंजूर केला. न्यायालयाने आरोपीसाठी काही अटी घालत जामिन मंजूर केला असून, आरोपीने फिर्यादी अथवा साक्षीदारांवर दबाव आणू नये, धमकावू नये, सरकारी पक्षाच्या पुराव्यात हस्तक्षेप करू नये, प्रत्येक मंगळवारी पोलिस स्टेशनमध्ये हजेरी लावावी, तपासात सहकार्य करावे तसेच न्यायालयाच्या परवानगीशिवाय परदेशात जाऊ नये, अशा अटी घालण्यात आल्या आहेत.
या प्रकरणी आरोपीच्या वतीने अॅड. अक्षय चिंदरकर यांनी युक्तिवाद केला.
