विद्यार्थिनींना कपडे बदलताना पाहणाऱ्या शिक्षकाविरोधात गुन्हा दाखल
कणकवली : तालुक्यातील एका हायस्कूलमधील शिक्षकाने अल्पवयीन विद्यार्थिनींना कपडे बदलताना चोरून बघत असल्याचा धक्कादायक प्रकार समोर आला. हा प्रकार बुधवारी १३ ऑगस्ट रोजी त्या हायस्कूलमध्येच घडला. या प्रकरणी पीडित विद्यार्थिनिंच्या नातेवाईकांनी कणकवली पोलीस ठाण्यात तक्रार दिली. तसेच याबाबत पालकमंत्री नितेश राणे यांचे देखील पालकांनी लक्ष वेधल्याचे समजते. त्यानुसार त्या शिक्षकावर बालकांचे लैंगिक शोषण संरक्षण कायद्यानुसार गुन्हा दाखल करण्यात आला आहे.
शिक्षकी पेशाला काळीमा फासणारी ही घटना घडल्याने तालुक्यात एकच खळबळ उडाली आहे.
त्या शिक्षकाने विद्यार्थिनींना वारंवार चोरून बघण्याचे कृत्य केले. दरम्यान यावेळी त्या शिक्षकाला विचारणा केली असता दरवाजाच्या असलेल्या फटिना पत्रा लावत होतो असा खुलासा देखील त्या शिक्षकाने केल्याची माहिती प्राप्त झाली आहे. पीडितांनी घडलेला प्रकार नातेवाईकांना सांगितला. त्यानंतर नातेवाईकांनी कणकवली पोलीस ठाण्यात त्या शिक्षका विरोधात तक्रार देखील दिली. त्यानंतर भरोसा सेलच्या अधिकारी नलिनी शिंदे व कणकवली पोलीस ठाण्याच्या पोलीस उपनिरीक्षक वृषाली बरगे यांनी त्या हायस्कूलमध्ये भेट देत त्या शिक्षकाला चौकशीसाठी ताब्यात घेतले. पीडित व तिच्या नातेवाईकांना पोलीस ठाण्यात बोलावून घेत या प्रकरणाची चौकशी केली. चौकशीअंती त्या शिक्षका विरोधात गुन्हा दाखल झाला.
यापूर्वी देखील त्या हायस्कूलमध्ये असे काही प्रकार घडल्याची चर्चा कणकवली शहरामध्ये सुरू असून याप्रकरणी त्या शिक्षकाने यापूर्वी केलेल्या गैर प्रकारांची चौकशी करण्याची मागणी केली जात आहे.
मटका अड्ड्यावर पालकमंत्री नाम. नितेश राणे यांनी धाड टाकल्याप्रकरणी पुढील चौकशीसाठी जिल्ह्याचे अप्पर पोलीस अधिक्षक नयोमी साटम या देखील या दरम्यान कणकवली पोलीस ठाण्यात आल्या होत्या. त्यावेळी त्यांच्याही कानी सदर प्रकारची त्या विद्यार्थिनींनी हकीकत दिली असल्याचेही समजले. मात्र आता त्या शिक्षकावर अटकेची टांगती तलवर असून या प्रकाराने सर्वत्र संतापजनक प्रतिक्रिया उमटत आहेत.
