पर्यटन वाढीसाठी सावडाव धबधब्याचा फायदा होणार – खा. नारायण राणे

सावडाव धबधब्याच्या नूतनीकरणाच्या कामाचे खा. नारायण राणे यांच्याहस्ते उद्घाटन

पालकमंत्री ना.नितेश राणे, जिल्हाधिकारी अनिल पाटील यांची प्रमुख उपस्थिती

कणकवली ( मयुर ठाकूर ) : सिंधुदुर्ग जिल्ह्यात वर्षा पर्यटनासाठी प्रसिद्ध असलेला कणकवली तालुक्यातील सावडाव धबधबा! या धबधब्याच सिंधुरत्न योजनेच्या माध्यमातून नूतनीकरण करण्यासाठी ६५ लाखांचा निधी मंजूर करण्यात आला होता. त्यानंतर येथील कामही पूर्ण करण्यात आले. या नूतनीकरणाच्या कामाचे माजी मुख्यमंत्री तथा माजी केंद्रीय मंत्री व सिंधुदुर्ग जिल्ह्याचे खासदार नारायण राणे यांच्या हस्ते तसेच पालकमंत्री ना. नितेश राणे यांच्या प्रमुख उपस्थितीत १५ ऑगस्ट स्वातंत्र्यदिना दिवशी उद्घाटन संपन्न झाले.

यावेळी मत्स्य व्यवसाय व बंदरे विकासमंत्री तथा पालकमंत्री नितेश राणे, जिल्हाधिकारी अनिल पाटील, प्रातांधिकारी जगदिश कातकर, तहसीलदार दीक्षांत देशपांडे, सार्वजनिक बांधकाम कार्यकारी अभियंता वीणा पुजारी, उपविभागीय अभियंता कमिलिनी प्रभू, कनिष्ठ अभियंता संजीवनी थोरात, विस्तार अधिकारी सूर्यकांत वारंग, सावडाव सरपंच आर्या वारंग, उपसरपंच दत्ता काटे, ग्रामपंचायत अधिकारी मधुरा भुजबळ, पोलीस पाटील अकुंश वारंग, भाजपचे तालुकाध्यक्ष मिलिंद मेस्त्री, उपतालुकाध्यक्ष संदीप सावंत, ओटव सरपंच रूहिता तांबे, शक्ती केंद्रप्रमुख राजू हिर्लेकर, व्यंकटेश वारंग, हेमंत परुळेकर, ग्रामस्थ आदी उपस्थित होते.

दरम्यान खा. नारायण राणे म्हणाले, सिंधुदुर्ग जिल्हा हा पर्यटन जिल्हा आहे. या पर्यटन जिल्ह्यासाठी अतिशय उपयुक्त आणि पर्यटकांना आकर्षित करू शकेल असा सावडाव येथील धबधबा आहे. पावसाळ्यात या ठिकाणी मोठी गर्दी असते. परंतु पावसाळ्यानंतर देखील धबधबा सुरू राहावा यासाठी आमचे प्रयत्न सुरू आहेत आणि त्या दृष्टीने डॅम चे काम देखील सुरू आहे. अनेक ठिकाणी नैसर्गिक संपत्तीचे प्रदर्शन कसे टिकवता येईल यासाठी देखील आम्ही प्रयत्न करत आहोत.

नापणे धबधब्यावरील काचेचे पूल हे जगभरातील पर्यटकांनी येऊन पहावं. महाराष्ट्रातील ते पहिले काचेचे पूल आहे. त्या माध्यमातून मोठ्या प्रमाणात पर्यटन वाढेल व पर्यटनाच्या माध्यमातून जिल्ह्याच्या व राज्याच्या उत्पन्नात भर पडेल, असा विश्वास खासदार नारायण राणे यांनी व्यक्त केला.