पोलीस घटनास्थळी दाखल ; पुढील तपास सुरू
कणकवली : तालुक्यातील जानवली कृष्णनगरी येथील श्री स्वयंभू दत्त मंदिरातून ५ जुलै रोजी पहाटेच्या सुमारास चोरीला गेलेली श्री दत्तमूर्ती गुरुवारी गुरु पौर्णिमेच्या दिवशी सकाळी ७:४५ वा. च्या सुमारास कृष्णनगरीकडे जाणाऱ्या रस्त्यावर पिशवीवर ठेवलेल्या स्थितीत आढळून आली. कृष्णानगरीच्या वॉचमनने याबाबत पोलिसांना माहिती दिली. कणकवली पोलीस व स्थानिक गुन्हा अन्वेषणचे पोलीस अधिकारी व कर्मचारी घटनास्थळी दाखल झाले होते. पंचनामा करून मूर्ती पोलिसांनी ताब्यात घेतली. गुरुवारी सकाळी ७.४५ वाजण्याच्या सुमारास महामार्गावरून कृष्णनगरीकडे जाणाऱ्या रस्त्याच्या कॉर्नरला एका पिशवीवर ठेवलेल्या स्थितीत ही मूर्ती वॉचमनला दिसून आली.
वॉचमनने सदर घटनेची माहिती कणकवली पोलिसांना दिली. पोलिसांना माहिती मिळताच पोलीस निरीक्षक अतुल जाधव, स्थानिक गुन्हा अन्वेषणचे पोलीस निरीक्षक प्रवीण कोल्हे, पोलीस उपनिरीक्षक अनिल हाडळ, पोलीस उपनिरीक्षक रामचंद्र शेळके, सहाय्यक पोलीस उपनिरीक्षक राजू जामसंडेकर, पोलीस हवालदार पांडुरंग पांढरे, श्री. कवटे, प्रकाश कदम, बस्त्याव डिसोजा, विल्सन डिसोजा, डॉमिनिक डिसोजा, सदा राणे, आशिष जामदार, श्री. समदिस्कर, किरण देसाई, सुरेश राठोड, जॅक्सन घोसालवीस तसेच फॉरेन्सिक अधिकारी व कर्मचारी घटनास्थळी दाखल झाले.
पोलीस अधिकारी व कर्मचाऱ्यांनी घटनास्थळी दाखल होत मूर्तीची पाहणी केली. दरम्यान ही मूर्ती या ठिकाणी कशी आणून ठेवण्यात आली, ती कोणत्या वाहनाने आणण्यात आली, मूर्ती चोरणारे ते चोरटे नेमके कोण, मूर्ती कोणत्या उद्देशाने चोरी केली असावी, असे अनेक प्रश्न अनुत्तरितच राहिले आहेत. या प्रकरणी पुढील तपास सुरू होता.
मूर्तीच्या काही भागाची मोडतोड करून केली छाननी ; चोरट्यांचा प्लॅन फसला
पोलिसांनी दिलेल्या माहितीनुसार अज्ञात चोरट्यांनी दरची मूर्ती ही सोन्याची मूर्ती असेल या उद्देशाने चोरी केली असावी. कारण घटनास्थळावरून मूर्ती चोरीला गेली तेव्हा सुस्थितीत होती. मात्र जेव्हा मूर्ती आढळून आली तेव्हा त्रिशूळाचा काही भाग व दत्त मूर्तिजवळ असलेल्या श्वनाच्या तोंडाचा काहीसा भाग तुटलेल्या अवस्थेत सापडला. त्यामुळे या भागांची मोडतोड करून सोन्याच्या मूर्तीच्या उद्देशाने त्यांची छाणणी केली असावी. व सदर मूर्ती सोन्याची नाही असे आढळून आल्यावर ती पुन्हा ज्या ठिकाणी चोरी केली तिथेच आणून ठेवण्याचा प्रयत्न केला आहे. परंतु चोरी करणारे चोरटे हे पिस्तुल किंवा जिवंत काडतुसे घटनास्थळी ठेवून गेले आहेत. ते सराईत असण्याची शक्यता पोलिसांनी तसेच तपासणी पथकाने वर्तवली आहे. पंरतु लवकरच अज्ञात चोरट्यांचा शोध घेऊ असे पोलीस प्रशासनाकडून सांगण्यात आले.
