कणकवली रेल्वे स्थानकावर मारामारी | रेल्वे पोलीस घटनास्थळी दाखल

कणकवली : तुतारी एक्सप्रेस कणकवली रेल्वे स्थानकावर येण्याची वेळ झालेली असतानाच तिकीट काढण्यासाठी रांगेत पुढे जाण्याचा प्रयत्न करण्यामध्ये दोन तरुणांमध्ये शाब्दिक बाचाबाची होऊन हाणामारी झाली. ही घटना मंगळवारी सायंकाळी ६.३० वा. च्या सुमारास घडली.

मंगळवारी नागपंचमी असल्याने तुतारी एक्सप्रेसमधून मुंबईला जाणारे प्रवासी मोठ्या संख्येने कणकवली रेल्वे स्थानकावर होते. जनरल तिकीटसाठी तिकीट काऊंटर समोरही मोठी रांग लागली होती. याच रांगेमध्ये पुढे जाण्याचा प्रयत्न एका तरूणाने केला. याचाच दुसऱ्या तरुणाला राग आला. दरम्यान यावेळी दोघांमध्ये बाचाबाची झाली आणि त्याचे रूपांतर हाणामारीत झाले.

यादरम्यान रेल्वे स्थानकावरील वातावरण काहीसे तणावग्रस्त झाले होते. पुढे रेल्वे सुरक्षा बलाच्या कर्मचाऱ्यांनी धाव घेऊन मारामारी सोडवली. दरम्यान कणकवली हे जिल्ह्यातील मध्यवर्ती रेल्वेस्थानक असल्याने येथे प्रवाशांची कायमच गर्दी असते. त्यामुळे येथे दोन तिकिट काऊंटरची आवश्यकता आहे.
याबाबत पालकमंत्री ना. नितेश राणे यांचे लक्ष वेधणार असल्याची माहिती तालुका प्रवासी संघटनेचे अध्यक्ष सुरेश सावंत व पदाधिकारी संजय मालंडकर यांनी दिली आहे.