कणकवली ( मयुर ठाकूर ) : तालुक्यातील ६४ ग्रामपंचायतीच्या सरपंच पदाचे आरक्षण जाहीर करण्यात आले असून ६४ पैकी ३३ ग्रामपंचायती वर महिलांचे वर्चस्व असणार आहे. आगामी पाच वर्षांसाठी महिलांचा दबदबा राहणार आहे. सन २०२५ ते २०३० या कालावधीसाठी सोमवारी जाहीर झालेल्या सरपंच पदाच्या आरक्षण सोडतीत कणकवली तालुक्यातील ६४ ग्रामपंचायतींपैकी तब्बल ३३ ग्रामपंचायतींचे सरपंचपद महिलांसाठी आरक्षित झाले आहे. ज्यामुळे अनेक गावांमध्ये उत्साहाचे तर काही ठिकाणी राजकीय समीकरणांची नव्याने जुळवाजुळव सुरू होणार आहे.
कणकवली येथील नगर वाचनालयाच्या सभागृहात तहसीलदार दीक्षांत देशपांडे सोमवारी सकाळी ११ वाजता ही सोडत जाहीर केली. चिठ्ठया उचलून आरक्षण निश्चित करण्यात आली.
कणकवली नगरवाचनालयाच्या बहुउद्देशीय सभागृहात रितेश पाटील व भार्गवी केळुसकर या दोन विद्यार्थ्यांच्या हस्ते चिठ्ठी उचलून आरक्षण सोडत काढण्यात आली. यावेळी निवडणूक निर्णय अधिकारी तथा तहसीलदार दीक्षांत देशपांडे, निवासी नायब तहसीलदार मंगेश यादव, संजय गांधी निराधार योजना नायब तहसीलदार गंगाराम कोकरे, निवडणूक नायब तहसीलदार विजय वरक, रणजित चौगुले, सर्जेराव राणे, संभाजी खाडये, सत्यवान माळवे, मनीषा बोडके आदी उपस्थित होते.
सोडतीवेळी विविध गावांतील संभाव्य उमेदवार, कार्यकर्ते आणि ग्रामस्थ उपस्थित होते. या आरक्षण सोडतीमुळे तालुक्यातील निम्या ग्रामपंचायतींचा कारभार महिलांच्या हाती येणार असल्याचे स्पष्ट झाले आहे.
कणकवली तालुक्यातील ६४ पैकी ३३ सरपंचपदे महिलांसाठी आरक्षीत करण्यात आली आहेत. यामध्ये अनुसूचित जाती प्रवर्ग महिला (3) यामध्ये नवीन कुर्ली, शिरवल, वाघेरी या गावांचा समावेश आहे.
अनुसूचित जाती प्रवर्ग (2)- पिसेकामते, दारिस्ते या गावात आरक्षण पडले आहे.
नागरिकांचा मागास महिला प्रवर्ग (9) कलमठ, लोरे, वागदे, हरकुळ बुद्रुक, जानवली, आशिये, नरडवे, नडगिवे, खारेपाटण हे गाव तर
नागरिकांचा मागास प्रवर्ग पुरुष (8) ओटव, ओझरम, ओसरगांव, कासार्डे, बुरबावडे, फोंडाघाट, बोर्डवे, आयनल हे गाव आहेत.
सर्वसाधारण प्रवर्ग महिला (21) कळसुली, कोळोशी, भरणी, घोणसरी, कुरंगवणे-बेर्ले, कसवण-तळवडे, सांगवे, शिडवणे, चिंचवली, नाटळ, गांधीनगर, तिवरे, असलदे, बेळणेखुर्द, डामरे, नांदगाव, तरंदळे, शिवडाव, तळेरे, साळीस्ते, कोंडये या गावावर महिला राज असणार आहे.
सर्वसाधारण प्रवर्ग (21) गाव असून यामध्ये करंजे, करुळ, कासरल, कुंभवडे, तोंडवली बावशी, दारूम, नागवे, बिडवाडी, भिरवंडे, माईण, वायंगणी, वारगांव, शेर्पे, सातरल, हळवल, हुंबरठ, सावडाव, दिगवळे, हरकुळ खुर्द, पियाळी, साकेडी या गावांचा समावेश आहे.
*इच्छुकांचा हिरमोड*
सरपंच पदाचे आरक्षण अनुकूल पडेल आणि आपणाला सरपंच पदाची पुन्हा संधी मिळेल यासाठी अनेक प्रस्थापितांनी तयारी सुरू केली होती मात्र सरपंच पदाचे आरक्षण जाहीर होताना काही ठिकाणी महिलांना संधी मिळाल्याने अनेकांची स्वप्न उध्वस्त झाली आहे. त्यामुळे काही ठिकाणी कही खुशी कही गम असे वातावरण होते. सरपंच आरक्षण सोडत निमित्ताने कणकवली नगर वाचनालयाच्या सभागृहात मोठ्या प्रमाणात गर्दी होईल असा अंदाज होता मात्र अनेकांनी आरक्षण यापूर्वीच गृहीत धरले असल्याने सभागृहात येणे टाळल्याचे दिसत होते. त्याचप्रमाणे आपल्या गावचे आरक्षण जाहीर झाल्यानंतर काहींच्या चेहऱ्यावर आनंद तर काहींच्या चेहऱ्यावर निराशा पसरल्याचे दिसत होते. अनेकांनी आरक्षण समजतात सभागृहातून जाणे पसंत केले त्यामुळे आरक्षण सोडत अत्यंत शांत वातावरणात पार पडली. तहसीलदार दीक्षांत देशपांडे यांनी आरक्षण सोडत बाबत मार्गदर्शन करताना यापूर्वी कशाप्रकारे आरक्षण पडले होते व त्यामध्ये आता कोणत्या प्रकारची सुधारणा करण्यात आली आहे याबाबतची सविस्तर माहिती उपस्थितांना दिली त्यामुळे अनेकांच्या शंकांचे निरसन झाल्याचे दिसून येत होते.
