शालेय विद्यार्थ्यांचे दाखले व प्रतिज्ञापत्राचे काम ठप्प
पालकमंत्री ना. नितेश राणे यांनी दखल घेत संबंधित प्रशासनाला केल्या सूचना
मंगळवारी दुपारनंतर सर्व्हर सुरळीत सुरू
कणकवली : सिंधुदुर्ग जिल्ह्यातील सेतु सुविधा कार्यालयांमधील महाऑनलाईनचा सर्व्हर डाऊन झाल्यामुळे प्रतिज्ञापत्र व विविध प्रकारचे दाखले अपलोडींग करण्याचे काम ठप्प झाले होते. महाविद्यालयीन शैक्षणिक प्रवेशासाठी विविध प्रकारचे विद्यार्थ्यांसाठी बंधनकारक आहेत. त्यामुळे नॉनक्रिमीलेअर, जात प्रमाणपत्र, रहिवासी प्रमाणपत्र, जात पडताळणी या दाखल्यांसाठी प्रतिज्ञापत्र आवश्यक असल्याने सेतु सुविधा केंद्रांबाहेर विद्यार्थी, पालक व सर्वसामान्य नागरिकांची मोठी गर्दी झाली होती. गेले काही दिवस महाऑनलाईनचा सर्व्हर डाऊन असल्याने विद्यार्थी पालकांसह सर्वसामान्यांची गैरसोय होत असल्याने संताप व्यक्त करण्यात येत होता.
याची दाखल सिंधुदुर्ग जिल्ह्याचे पालकमंत्री ना. नितेश राणे यांनी घेतली. जिल्हाधिकारी अनिल पाटील यांच्याशी संपर्क साधत प्रतिज्ञापत्र वेळेत देण्याबाबत नियोजन करा, अशा सुचना दिल्या होत्या. त्यानंतर जिल्हाधिकारी अनिल पाटील यांनी संचालक महाऑनलाईन यांच्याशी संपर्क साधत सिंधुदुर्ग जिल्ह्यात निर्माण झालेल्या महाऑनलाईनच्या सर्व्हरबाबत माहिती दिली. तसेच विद्यार्थी, पालकांना आणि सर्वसामान्य नागरिकांना त्रास होत असल्याबाबत कल्पना दिली. त्यानंतर मंगळवारी जिल्ह्यातील महाऑनलाईनचा सर्व्हर सुस्थितीत सुरू होऊन प्रतिज्ञापत्रांच्या तसेच दाखल्यांच्या कामांना सुरुवात झाली आहे. ही समस्या मार्गी लावल्याबद्दल पालकमंत्री नितेश राणे यांचे जिल्ह्यातील पालकांनी व विद्यार्थ्यांनी आभार मानले आहेत.
