दाट धुके असल्याने शोध मोहीम थांबवली
रेस्क्यु पथकाच्या मदतीने शोध घेणार…
सावंतवाडी : आंबोली येथे तब्बल चारशे फुट खोल दरीत कोसळलेला संबधित तरुण हा कोल्हापुर येथील जिल्हा परिषदचा कर्मचारी असल्याची माहिती पुढे आली आहे. राजेंद्र बाळासो सनगर (वय ४५, रा. चिले कॉलनी) असे त्याचे नाव आहे. तो आपल्या १४ मित्रां समवेत त्याठिकाणी वर्षा पर्यटनाचा आनंद लुटण्यासाठी आला होता. दरम्यान ही घटना घडल्यानंतर त्या ठिकाणी आंबोेली पोलिसांनी धाव घेतली. मात्र दाट धुके असल्यामुळे मदतकार्यात अडचणी आल्या तसेच काळोख पडल्यामुळे ही मोहीम थांबविण्याचा निर्णय घेण्यात आला. उद्या सकाळी त्याचा रेस्क्यू पथकाच्या मदतीने शोध घेण्यात येणार आहे, असे पोलिसांकडुन सांगण्यात आले. याबाबत अधिक माहिती अशी की, कोल्हापुर येथील सनगर ह्या जिल्हा परिषदेत कनिष्ठ सहाय्यक म्हणून कार्यरत आहेत. आज ते आपल्या मित्रां समवेत पर्यटनाचा आनंद लुटण्यासाठी कावळेसाद येथे आले होते. यावेळी त्या ठिकाणी दरीतून उलटे येणार्‍या पाण्यात त्यांनी रुमाल उडविण्याचा आनंंद घेत होते. यावेळी त्याचा रुमाल दरीच्या तोंडावर पडला यावेळी त्या ठीकाणी रुमाल आणण्यासाठी गेले असता ती जागा निसरडी असल्यामुळे ते थेट दरीत कोसळले. हा प्रकार इतका भयानक होता की कोणाच्या काहीच लक्षात आले नाही. त्यामुळे त्यांच्या समवेत असलेल्या सर्वांनी आरडाओरड केली व घडलेली घटना त्या ठिकाणी असलेल्या स्टॉल चालकांना सागितली त्यांनी याबाबतची माहिती गेळे सरपंच सागर ढोकरे यांना दिली त्यानुसार ढोकरे यांनी पोलिसांना पाचारण केले त्यानंतर त्या ठिकाणी पोलिस दाखल झाले. ग्रामस्थांच्या मदतीने शोधकार्य करण्यात आले. मात्र दरीत दाट धुके असल्यामुळे मोहीम अर्ध्यावरच थांबवावी लागली. उद्या सकाळी ही मोहीम पुन्हा सुरू करण्यात येणार आहे, असे पोलिसांचे म्हणणे आहे.
