बजरंग दलाचे विशेष सहकार्य : टेम्पोसह चालक पोलीस ठाण्यात
कणकवली : ग्रामीण भागातून नांदगाव मार्गे मुंबई – गोवा महामार्गावरुन कणकवलीच्या दिशेने महिंद्र पिकअप टेंम्पो गुरे वाहतूक करत होता. सदरचा टेम्पो हा घाटमाथ्यावरील असल्याचे निदर्शनास आले. येथील लतानगरी दरम्यान पाठलाग करत बजरंग दलाने पकडला. यामध्ये काही गुरे आढळून आली आहेत. त्यामुळे बजरंग दलाचे कार्यकर्ते संतप्त झाले होते. वातावरण तणावपूर्ण बनल्यावर जमावही वाढला. याबाबत कणकवली पोलीस ठाण्यात माहिती देण्यात आली.
घटनेची माहिती मिळताच पोलीस निरीक्षक मारुती जगताप आपल्या सहकारी पोलीस उपनिरीक्षक श्री. शेडगे यांच्यासह पोलीस नाईक रुपेश गुरव, आदी घटनास्थळी दाखल झाले.
यावेळी गुरे वाहतूक करणाऱ्या टेम्पोसह चालकाला कणकवली पोलीस ठाण्यात आणण्यात आले. दरम्यान उपस्थितांनी सदर गुरे गो शाळेत देण्यात यावी आणि आरोपीवर कठोर कारवाई करावी, अशी मागणी केली. ही घटना शुक्रवारी सकाळी १०.४५ वा. च्या सुमारास घडली.
यावेळी बजरंग दलाचे सागर डंबे, निखिल पिसे, तेजस भांबुंरे, श्री. खरात, अमोल गावकर, प्रदीप हरमलकर, श्रीकृष्ण वायंगणकर, प्रतिक भाट, नांदगाव सरपंच भाई मोरजकर, पंढरी वायंगणकर, बेळणे उपसरपंच पंढरीनाथ चाळके, बेळणे पोलीस पाटील श्री. चाळके आदी दाखल झाले होते.
